ທັມສະມາທານ ໔ ຢ່າງ

The Buddha's words

ມັຊຊິມະນິກາຍ ມູລະປັນນາສກ໌ ໑໒/໓໙໙/໕໒໐

Photo by Hennie Stander on Unsplash

ສມັຍໜຶ່ງ ພຣະຜູ້ມີພຣະພາຄປະທັບຢູ່ທີ່ພຣະວິຫາຣເຊຕະວັນ ອາຣາມຂອງທ່ານອະນາຖະບິດິກະເສດຖີ ເຂຕພຣະນະຄອຣສາວັຕຖີ ໃນທີ່ນັ້ນແລ ພຣະຜູ້ມີພຣະພາຄຕຣັສຮຽກພິກຂຸທັງຫລາຍວ່າ:

ພິກຂຸທັງຫລາຍ!

ພິກຂຸເຫລົ່ານັ້ນທູລຮັບພຣະດຳຣັສຂອງພຣະຜູ້ມີພຣະພາຄແລ້ວ ພຣະຜູ້ມີພຣະພາຄຕຣັສວ່າ:

ພິກຂຸທັງຫລາຍ! ໂດຍສ່ວນຫລາຍສັຕທັງຫລາຍມີຄວາມປາຖນາ ມີຄວາມພໍໃຈ ມີຄວາມປະສົງຢ່າງນີ້ວ່າ ໂອໜໍ ທັມທີ່ບໍ່ໜ້າປາຖນາ ບໍ່ໜ້າຮັກໃຄ່ ບໍ່ໜ້າພໍໃຈ ຈົ່ງເສື່ອມໄປ ທັມທີ່ໜ້າປາຖນາ ໜ້າຮັກໃຄ່ ໜ້າພໍໃຈ ຈົ່ງຈະເຣີນຂຶ້ນ ດັ່ງນີ້.

ພິກຂຸທັງຫລາຍ! ເມື່ອສັຕເຫລົ່ານັ້ນມີຄວາມປາຖນາ ມີຄວາມພໍໃຈ ມີຄວາມປະສົງຢ່າງນີ້ ທັມທີ່ບໍ່ໜ້າປາຖນາ ບໍ່ໜ້າຮັກໃຄ່ ບໍ່ໜ້າພໍໃຈ ຍ່ອມຈະເຣີນຍິ່ງ ທັມທີ່ໜ້າປາຖນາ ໜ້າຮັກໃຄ່ ໜ້າພໍໃຈ ຍ່ອມເສື່ອມໄປ, ພິກຂຸທັງຫລາຍ ໃນຂໍ້ນັ້ນ ພວກເຈົ້າທັງຫລາຍຍ່ອມເຂົ້າໃຈເຫຕນັ້ນຢ່າງໃດ?

ພິກຂຸເຫລົ່ານັ້ນກຣາບທູລວ່າ:

ຂ້າແຕ່ພຣະອົງຄ໌ຜູ້ຈະເຣີນ! ທັມທັງຫລາຍຂອງພວກຂ້ານ້ອຍມີພຣະຜູ້ມີພຣະພາຄເປັນມູລ ມີພຣະຜູ້ມີພຣະພາຄເປັນຜູ້ນຳ ມີພຣະຜູ້ມີພຣະພາຄເປັນທີ່ເພິ່ງອາສັຍ. ຂ້າແຕ່ພຣະອົງຄ໌ຜູ້ຈະເຣີນ ຂໍປະທານພຣະວະໂຣກາສ ຂໍເນື້ອຄວາມແຫ່ງພາສິຕນັ້ນຈົ່ງແຈ່ມແຈ້ງກັບພຣະຜູ້ມີພຣະພາຄເຖີດ ພິກຂຸທັງຫລາຍໄດ້ຟັງຕໍ່ພຣະຜູ້ມີພຣະພາຄແລ້ວ ຈັກຊົງຈຳໄວ້.

ພິກຂຸທັງຫລາຍ! ຖ້າຢ່າງນັ້ນ ພວກເຈົ້າທັງຫລາຍຈົ່ງຟັງ ຈົ່ງໃສ່ໃຈໃຫ້ດີ ເຮົາຈັກກ່າວ. ພິກຂຸເຫລົ່ານັ້ນທູລຮັບພຣະດຳຣັສຂອງພຣະຜູ້ມີພຣະພາຄແລ້ວ ພຣະຜູ້ມີພຣະພາຄຕຣັສວ່າ:

ພິກຂຸທັງຫລາຍ! ປຸຖຸຊົນຜູ້ບໍ່ໄດ້ສະດັບໃນໂລກນີ້ ບໍ່ໄດ້ເຫັນພຣະອະຣິຍະ ບໍ່ສລາດໃນທັມຂອງພຣະອະຣິຍະ ບໍ່ໄດ້ຝຶກໃນທັມຂອງພຣະອະຣິຍະ ບໍ່ໄດ້ເຫັນສັປບຸຣຸສ ບໍ່ສລາດໃນທັມຂອງສັປບຸຣຸສ ບໍ່ໄດ້ຝຶກໃນທັມຂອງສັປບຸຣຸສ ຍ່ອມບໍ່ຮູ້ຈັກທັມທີ່ຄວນເສພ ຍ່ອມບໍ່ຮູ້ຈັກທັມທີ່ບໍ່ຄວນເສພ ຍ່ອມບໍ່ຮູ້ຈັກທັມທີ່ຄວນຄົບ ຍ່ອມບໍ່ຮູ້ຈັກທັມທີ່ບໍ່ຄວນຄົບ ເມື່ອບໍ່ຮູ້ຈັກທັມທີ່ຄວນເສພ ບໍ່ຮູ້ຈັກທັມທີ່ບໍ່ຄວນເສພ ບໍ່ຮູ້ຈັກທັມທີ່ຄວນຄົບ ບໍ່ຮູ້ຈັກທັມທີ່ບໍ່ຄວນຄົບ ກໍເສພທັມທີ່ບໍ່ຄວນເສພ ບໍ່ເສພທັມທີ່ຄວນເສພ ຄົບທັມທີ່ບໍ່ຄວນຄົບ ບໍ່ຄົບທັມທີ່ຄວນຄົບ ເມື່ອເສພທັມທີ່ບໍ່ຄວນເສພ ບໍ່ເສພທັມທີ່ຄວນເສພ ຄົບທັມທີ່ບໍ່ຄວນຄົບ ບໍ່ຄົບທັມທີ່ຄວນຄົບ ທັມທີ່ບໍ່ໜ້າປາຖນາ ບໍ່ໜ້າຮັກໃຄ່ ບໍ່ໜ້າພໍໃຈ ຍ່ອມຈະເຣີນຍິ່ງ ທັມທີ່ໜ້າປາຖນາ ໜ້າຮັກໃຄ່ ໜ້າພໍໃຈ ຍ່ອມເສື່ອມໄປ ຂໍ້ນັ້ນເປັນເພາະເຫຕໃດ? ເປັນເພາະປຸຖຸຊົນບໍ່ຮູ້ຖືກຕ້ອງ.

ພິກຂຸທັງຫລາຍ! ສ່ວນອະຣິຍະສາວົກຜູ້ໄດ້ສະດັບແລ້ວ ໄດ້ເຫັນພຣະອະຣິຍະ ສລາດໃນທັມຂອງພຣະອະຣິຍະ ໄດ້ຝຶກດີແລ້ວໃນທັມຂອງພຣະອະຣິຍະ ໄດ້ເຫັນສັປບຸຣຸສ ສລາດໃນທັມຂອງສັປບຸຣຸສ ໄດ້ຝຶກດີແລ້ວໃນທັມຂອງສັປບຸຣຸສ ຍ່ອມຮູ້ຈັກທັມທີ່ຄວນເສພ ຍ່ອມຮູ້ຈັກທັມທີ່ບໍ່ຄວນເສພ ຍ່ອມຮູ້ຈັກທັມທີ່ຄວນຄົບ ຍ່ອມຮູ້ຈັກທັມທີ່ບໍ່ຄວນຄົບ ເມື່ອຮູ້ຈັກທັມທີ່ຄວນເສພ ຮູ້ຈັກທັມທີ່ບໍ່ຄວນເສພ ຮູ້ຈັກທັມທີ່ຄວນຄົບ ຮູ້ຈັກທັມທີ່ບໍ່ຄວນຄົບ ກໍບໍ່ເສພທັມທີ່ບໍ່ຄວນເສພ ຍ່ອມເສພທັມທີ່ຄວນເສພ ບໍ່ຄົບທັມທີ່ບໍ່ຄວນຄົບ ຍ່ອມຄົບທັມທີ່ຄວນຄົບ ເມື່ອບໍ່ເສພທັມທີ່ບໍ່ຄວນເສພ ເສພທັມທີ່ຄວນເສພ ບໍ່ຄົບທັມທີ່ບໍ່ຄວນຄົບ ຄົບທັມທີ່ຄວນຄົບ ທັມທີ່ບໍ່ໜ້າປາຖນາ ບໍ່ໜ້າຮັກໃຄ່ ບໍ່ໜ້າພໍໃຈ ຍ່ອມເສື່ອມໄປ ທັມທີ່ໜ້າປາຖນາ ໜ້າຮັກໃຄ່ ໜ້າພໍໃຈ ຍ່ອມຈະເຣີນຍິ່ງ ຂໍ້ນັ້ນເປັນເພາະເຫຕໃດ? ເປັນເພາະອະຣິຍະສາວົກຮູ້ຖືກຕ້ອງ.

ພິກຂຸທັງຫລາຍ! ທັມສະມາທານ ໔ ຢ່າງນີ້, ໔ ຢ່າງເປັນຢ່າງໃດ?

ທັມສະມາທານທີ່ມີທຸກຂ໌ໃນປັຈຈຸບັນ ແລະມີທຸກຂ໌ເປັນວິບາກຕໍ່ໄປກໍມີ.

ທັມສະມາທານທີ່ມີສຸຂໃນປັຈຈຸບັນ ແຕ່ມີທຸກຂ໌ເປັນວິບາກຕໍ່ໄປກໍມີ.

ທັມສະມາທານທີ່ມີທຸກຂ໌ໃນປັຈຈຸບັນ ແຕ່ມີສຸຂເປັນວິບາກຕໍ່ໄປກໍມີ.

ທັມສະມາທານທີ່ມີສຸຂໃນປັຈຈຸບັນ ແລະມີສຸຂເປັນວິບາກຕໍ່ໄປກໍມີ.

ພິກຂຸທັງຫລາຍ! ບັນດາທັມສະມາທານເຫລົ່ານັ້ນ ບຸຄຄົລບໍ່ຮູ້ຈັກທັມສະມາທານທີ່ມີທຸກຂ໌ໃນປັຈຈຸບັນ ແລະມີທຸກຂ໌ເປັນວິບາກຕໍ່ໄປ ໄປແລ້ວໃນອະວິຊຊາ ຍ່ອມບໍ່ຮູ້ຊັດຕາມຄວາມເປັນຈິງວ່າ ທັມສະມາທານນີ້ແລ ທີ່ມີທຸກຂ໌ໃນປັຈຈຸບັນ ແລະມີທຸກຂ໌ເປັນວິບາກຕໍ່ໄປ ເມື່ອບໍ່ຮູ້ຈັກທັມສະມາທານນັ້ນ ໄປແລ້ວໃນອະວິຊຊາ ບໍ່ຮູ້ຊັດຕາມຄວາມເປັນຈິງ ຈຶ່ງເສພທັມສະມາທານນັ້ນ ບໍ່ລະເວັ້ນທັມສະມາທານນັ້ນ ເມື່ອເສພທັມສະມາທານນັ້ນ ບໍ່ລະເວັ້ນທັມສະມາທານນັ້ນ ທັມທີ່ບໍ່ໜ້າປາຖນາ ບໍ່ໜ້າຮັກໃຄ່ ບໍ່ໜ້າພໍໃຈ ຍ່ອມຈະເຣີນຍິ່ງ ທັມທີ່ໜ້າປາຖນາ ໜ້າຮັກໃຄ່ ໜ້າພໍໃຈ ຍ່ອມເສື່ອມໄປ ຂໍ້ນັ້ນເປັນເພາະເຫຕໃດ? ເປັນເພາະບຸຄຄົລນັ້ນບໍ່ຮູ້ຖືກຕ້ອງ.

ພິກຂຸທັງຫລາຍ! ບັນດາທັມສະມາທານເຫລົ່ານັ້ນ ບຸຄຄົລບໍ່ຮູ້ຈັກທັມສະມາທານທີ່ມີສຸຂໃນປັຈຈຸບັນ ແຕ່ມີທຸກຂ໌ເປັນວິບາກຕໍ່ໄປ ໄປແລ້ວໃນອະວິຊຊາ ຍ່ອມບໍ່ຮູ້ຊັດຕາມຄວາມເປັນຈິງວ່າ ທັມສະມາທານນີ້ແລ ທີ່ມີສຸຂໃນປັຈຈຸບັນ ແຕ່ມີທຸກຂ໌ເປັນວິບາກຕໍ່ໄປ ເມື່ອບໍ່ຮູ້ຈັກທັມສະມາທານນັ້ນ ໄປແລ້ວໃນອະວິຊຊາ ບໍ່ຮູ້ຊັດຕາມຄວາມເປັນຈິງ ຈຶ່ງເສພທັມສະມາທານນັ້ນ ບໍ່ລະເວັ້ນທັມສະມາທານນັ້ນ ເມື່ອເສພທັມສະມາທານນັ້ນ ບໍ່ລະເວັ້ນທັມສະມາທານນັ້ນ ທັມທີ່ບໍ່ໜ້າປາຖນາ ບໍ່ໜ້າຮັກໃຄ່ ບໍ່ໜ້າພໍໃຈ ຍ່ອມຈະເຣີນຍິ່ງ ທັມທີ່ໜ້າປາຖນາ ໜ້າຮັກໃຄ່ ໜ້າພໍໃຈ ຍ່ອມເສື່ອມໄປ ຂໍ້ນັ້ນເປັນເພາະເຫຕໃດ? ເປັນເພາະບຸຄຄົລນັ້ນບໍ່ຮູ້ຖືກຕ້ອງ.

ພິກຂຸທັງຫລາຍ! ບັນດາທັມສະມາທານເຫລົ່ານັ້ນ ບຸຄຄົລບໍ່ຮູ້ຈັກທັມສະມາທານທີ່ມີທຸກຂ໌ໃນປັຈຈຸບັນ ແຕ່ມີສຸຂເປັນວິບາກຕໍ່ໄປ ໄປແລ້ວໃນອະວິຊຊາ ຍ່ອມບໍ່ຮູ້ຊັດຕາມຄວາມເປັນຈິງວ່າ ທັມສະມາທານນີ້ແລ ທີ່ມີທຸກຂ໌ໃນປັຈຈຸບັນ ແຕ່ມີສຸຂເປັນວິບາກຕໍ່ໄປ ເມື່ອບໍ່ຮູ້ຈັກທັມສະມາທານນັ້ນ ໄປແລ້ວໃນອະວິຊຊາ ບໍ່ຮູ້ຊັດຕາມຄວາມເປັນຈິງ ຈຶ່ງບໍ່ເສພທັມສະມາທານນັ້ນ ລະເວັ້ນທັມສະມາທານນັ້ນ ເມື່ອບໍ່ເສພທັມສະມາທານນັ້ນ ລະເວັ້ນທັມສະມາທານນັ້ນ ທັມທີ່ບໍ່ໜ້າປາຖນາ ບໍ່ໜ້າຮັກໃຄ່ ບໍ່ໜ້າພໍໃຈ ຍ່ອມຈະເຣີນຍິ່ງ ທັມທີ່ໜ້າປາຖນາ ໜ້າຮັກໃຄ່ ໜ້າພໍໃຈ ຍ່ອມເສື່ອມໄປ ຂໍ້ນັ້ນເປັນເພາະເຫຕໃດ? ເປັນເພາະບຸຄຄົລນັ້ນບໍ່ຮູ້ຖືກຕ້ອງ.

ພິກຂຸທັງຫລາຍ! ບັນດາທັມສະມາທານເຫລົ່ານັ້ນ ບຸຄຄົລບໍ່ຮູ້ຈັກທັມສະມາທານທີ່ມີສຸຂໃນປັຈຈຸບັນ ແລະມີສຸຂເປັນວິບາກຕໍ່ໄປ ໄປແລ້ວໃນອະວິຊຊາ ຍ່ອມບໍ່ຮູ້ຊັດຕາມຄວາມເປັນຈິງວ່າ ທັມສະມາທານນີ້ແລ ມີສຸຂໃນປັຈຈຸບັນ ແລະມີສຸຂເປັນວິບາກຕໍ່ໄປ ເມື່ອບໍ່ຮູ້ຈັກທັມສະມາທານນັ້ນ ໄປແລ້ວໃນອະວິຊຊາ ບໍ່ຮູ້ຊັດຕາມຄວາມເປັນຈິງ ຈຶ່ງບໍ່ເສພທັມສະມາທານນັ້ນ ລະເວັ້ນທັມສະມາທານນັ້ນ ເມື່ອບໍ່ເສພທັມສະມາທານນັ້ນ ລະເວັ້ນທັມສະມາທານນັ້ນ ທັມທີ່ບໍ່ໜ້າປາຖນາ ບໍ່ໜ້າຮັກໃຄ່ ບໍ່ໜ້າພໍໃຈ ຍ່ອມຈະເຣີນຍິ່ງ ທັມທີ່ໜ້າປາຖນາ ໜ້າຮັກໃຄ່ ໜ້າພໍໃຈ ຍ່ອມເສື່ອມໄປ ຂໍ້ນັ້ນເປັນເພາະເຫຕໃດ? ເປັນເພາະບຸຄຄົລນັ້ນບໍ່ຮູ້ຖືກຕ້ອງ.

ພິກຂຸທັງຫລາຍ! ບັນດາທັມສະມາທານເຫລົ່ານັ້ນ ບຸຄຄົລຮູ້ຈັກທັມສະມາທານທີ່ມີທຸກຂ໌ໃນປັຈຈຸບັນ ແລະມີທຸກຂ໌ເປັນວິບາກຕໍ່ໄປ ໄປແລ້ວໃນວິຊຊາ ຍ່ອມຮູ້ຊັດຕາມຄວາມເປັນຈິງວ່າ ທັມສະມາທານນີ້ແລ ທີ່ມີທຸກຂ໌ໃນປັຈຈຸບັນ ແລະມີທຸກຂ໌ເປັນວິບາກຕໍ່ໄປ ເມື່ອຮູ້ຈັກທັມສະມາທານນັ້ນ ໄປແລ້ວໃນວິຊຊາ ຍ່ອມຮູ້ຊັດຕາມຄວາມເປັນຈິງ ຈຶ່ງບໍ່ເສພທັມສະມາທານນັ້ນ ລະເວັ້ນທັມສະມາທານນັ້ນ ເມື່ອບໍ່ເສພທັມສະມາທານນັ້ນ ລະເວັ້ນທັມສະມາທານນັ້ນ ທັມທີ່ບໍ່ໜ້າປາຖນາ ບໍ່ໜ້າຮັກໃຄ່ ບໍ່ໜ້າພໍໃຈ ຍ່ອມເສື່ອມໄປ ທັມທີ່ໜ້າປາຖນາ ໜ້າຮັກໃຄ່ ໜ້າພໍໃຈ ຍ່ອມຈະເຣີນຍິ່ງ ຂໍ້ນັ້ນເປັນເພາະເຫຕໃດ? ເປັນເພາະບຸຄຄົລນັ້ນຮູ້ຖືກຕ້ອງ.

ພິກຂຸທັງຫລາຍ! ບັນດາທັມສະມາທານເຫລົ່ານັ້ນ ບຸຄຄົລຮູ້ຈັກທັມສະມາທານທີ່ມີສຸຂໃນປັຈຈຸບັນ ແຕ່ມີທຸກຂ໌ເປັນວິບາກຕໍ່ໄປ ໄປແລ້ວໃນວິຊຊາ ຍ່ອມຮູ້ຊັດຕາມຄວາມເປັນຈິງວ່າ ທັມສະມາທານນີ້ແລ ທີ່ມີສຸຂໃນປັຈຈຸບັນ ແຕ່ມີທຸກຂ໌ເປັນວິບາກຕໍ່ໄປ ເມື່ອຮູ້ຈັກທັມສະມາທານນັ້ນ ໄປແລ້ວໃນວິຊຊາ ຍ່ອມຮູ້ຊັດຕາມຄວາມເປັນຈິງ ຈຶ່ງບໍ່ເສພທັມສະມາທານນັ້ນ ລະເວັ້ນທັມສະມາທານນັ້ນ ເມື່ອບໍ່ເສພທັມສະມາທານນັ້ນ ລະເວັ້ນທັມສະມາທານນັ້ນ ທັມທີ່ບໍ່ໜ້າປາຖນາ ບໍ່ໜ້າຮັກໃຄ່ ບໍ່ໜ້າພໍໃຈ ຍ່ອມເສື່ອມໄປ ທັມທີ່ໜ້າປາຖນາ ໜ້າຮັກໃຄ່ ໜ້າພໍໃຈ ຍ່ອມຈະເຣີນຍິ່ງ ຂໍ້ນັ້ນເປັນເພາະເຫຕໃດ? ເປັນເພາະບຸຄຄົລນັ້ນຮູ້ຖືກຕ້ອງ.

ພິກຂຸທັງຫລາຍ! ບັນດາທັມສະມາທານເຫລົ່ານັ້ນ ບຸຄຄົລຮູ້ຈັກທັມສະມາທານທີ່ມີທຸກຂ໌ໃນປັຈຈຸບັນ ແຕ່ມີສຸຂເປັນວິບາກຕໍ່ໄປ ໄປແລ້ວໃນວິຊຊາ ຍ່ອມຮູ້ຊັດຕາມຄວາມເປັນຈິງວ່າ ທັມສະມາທານນີ້ແລ ທີ່ມີທຸກຂ໌ໃນປັຈຈຸບັນ ແຕ່ມີສຸຂເປັນວິບາກຕໍ່ໄປ ເມື່ອຮູ້ຈັກທັມສະມາທານນັ້ນ ໄປແລ້ວໃນວິຊຊາ ຍ່ອມຮູ້ຊັດຕາມຄວາມເປັນຈິງ ຈຶ່ງເສພທັມສະມາທານນັ້ນ ບໍ່ລະເວັ້ນທັມສະມາທານນັ້ນ ເມື່ອເສພທັມສະມາທານນັ້ນ ບໍ່ລະເວັ້ນທັມສະມາທານນັ້ນ ທັມທີ່ບໍ່ໜ້າປາຖນາ ບໍ່ໜ້າຮັກໃຄ່ ບໍ່ໜ້າພໍໃຈ ຍ່ອມເສື່ອມໄປ ທັມທີ່ໜ້າປາຖນາ ໜ້າຮັກໃຄ່ ໜ້າພໍໃຈ ຍ່ອມຈະເຣີນຍິ່ງ ຂໍ້ນັ້ນເປັນເພາະເຫຕໃດ? ເປັນເພາະບຸຄຄົລນັ້ນຮູ້ຖືກຕ້ອງ.

ພິກຂຸທັງຫລາຍ! ບັນດາທັມສະມາທານເຫລົ່ານັ້ນ ບຸຄຄົລຮູ້ຈັກທັມສະມາທານທີ່ມີສຸຂໃນປັຈຈຸບັນ ແລະມີສຸຂເປັນວິບາກຕໍ່ໄປ ໄປແລ້ວໃນວິຊຊາ ຍ່ອມຮູ້ຊັດຕາມຄວາມເປັນຈິງວ່າ ທັມສະມາທານນີ້ແລ ມີສຸຂໃນປັຈຈຸບັນ ແລະມີສຸຂເປັນວິບາກຕໍ່ໄປ ເມື່ອຮູ້ຈັກທັມສະມາທານນັ້ນ ໄປແລ້ວໃນວິຊຊາ ຍ່ອມຮູ້ຊັດຕາມຄວາມເປັນຈິງ ຈຶ່ງເສພທັມສະມາທານນັ້ນ ບໍ່ລະເວັ້ນທັມສະມາທານນັ້ນ ເມື່ອເສພທັມສະມາທານນັ້ນ ບໍ່ລະເວັ້ນທັມສະມາທານນັ້ນ ທັມທີ່ບໍ່ໜ້າປາຖນາ ບໍ່ໜ້າຮັກໃຄ່ ບໍ່ໜ້າພໍໃຈ ຍ່ອມເສື່ອມໄປ ທັມທີ່ໜ້າປາຖນາ ໜ້າຮັກໃຄ່ ໜ້າພໍໃຈ ຍ່ອມຈະເຣີນຍິ່ງ ຂໍ້ນັ້ນເປັນເພາະເຫຕໃດ? ເປັນເພາະບຸຄຄົລນັ້ນຮູ້ຖືກຕ້ອງ.

ພິກຂຸທັງຫລາຍ! ກໍທັມສະມາທານທີ່ມີທຸກຂ໌ໃນປັຈຈຸບັນ ແລະມີທຸກຂ໌ເປັນວິບາກຕໍ່ໄປເປັນຢ່າງໃດ?

ພິກຂຸທັງຫລາຍ! ບຸຄຄົລບາງຄົນໃນໂລກນີ້ ເປັນຜູ້ຂ້າສັຕ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມ ສເວີຍທຸກຂ໌ໂທມະນັສ ເພາະປານາຕິບາຕເປັນປັຈຈັຍ.

ເປັນຜູ້ຖືເອົາສິ່ງຂອງທີ່ເຂົາບໍ່ໄດ້ໃຫ້ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະອະທິນນາທານເປັນປັຈຈັຍ.

ເປັນຜູ້ປະພຶຕຜິດໃນກາມທັງຫລາຍ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະກາເມສຸມິຈສາຈາຣເປັນປັຈຈັຍ.

ເປັນຜູ້ເວົ້າຕົວະ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະມຸສາວາທເປັນປັຈຈັຍ.

ເປັນຜູ້ເວົ້າສຽດສີ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະປິສຸນາວາຈາເປັນປັຈຈັຍ.

ເປັນຜູ້ເວົ້າຄຳຫຍາບ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະຜະຣຸສະວາຈາເປັນປັຈຈັຍ.

ເປັນຜູ້ເວົ້າຄຳສັມຜັປປະລາປະ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະສັມຜັປປະລາປະເປັນປັຈຈັຍ.

ເປັນຜູ້ມີອະພິຊຊາຫລາຍ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະອະພິຊຊາເປັນປັຈຈັຍ.

ເປັນຜູ້ມີຈິຕພະຍາບາທ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະພະຍາບາທເປັນປັຈຈັຍ.

ເປັນຜູ້ມີຄວາມເຫັນຜິດ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະມິຈສາທິຕຖິເປັນປັຈຈັຍ.

ເມື່ອແຕກກາຍຕາຍໄປ ເຂົາຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ.

ພິກຂຸທັງຫລາຍ! ທັມສະມາທານນີ້ແລ ທີ່ມີທຸກຂ໌ໃນປັຈຈຸບັນ ແລະມີທຸກຂ໌ເປັນວິບາກຕໍ່ໄປ.

ພິກຂຸທັງຫລາຍ! ກໍທັມສະມາທານທີ່ມີສຸຂໃນປັຈຈຸບັນ ແຕ່ມີທຸກຂ໌ເປັນວິບາກຕໍ່ໄປເປັນຢ່າງໃດ?

ພິກຂຸທັງຫລາຍ! ບຸຄຄົລບາງຄົນໃນໂລກນີ້ ເປັນຜູ້ຂ້າສັຕ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະປານາຕິບາຕເປັນປັຈຈັຍ.

ເປັນຜູ້ຖືເອົາສິ່ງຂອງທີ່ເຂົາບໍ່ໄດ້ໃຫ້ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະອະທິນນາທານເປັນປັຈຈັຍ.

ເປັນຜູ້ປະພຶຕຜິດໃນກາມທັງຫລາຍ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະກາເມສຸມິຈສາຈາຣເປັນປັຈຈັຍ.

ເປັນຜູ້ເວົ້າຕົວະ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະມຸສາວາທເປັນປັຈຈັຍ.

ເປັນຜູ້ເວົ້າສຽດສີ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະປິສຸນາວາຈາເປັນປັຈຈັຍ.

ເປັນຜູ້ເວົ້າຄຳຫຍາບ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະຜະຣຸສະວາຈາເປັນປັຈຈັຍ.

ເປັນຜູ້ເວົ້າຄຳສັມຜັປປະລາປະ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະສັມຜັປປະລາປະເປັນປັຈຈັຍ.

ເປັນຜູ້ມີອະພິຊຊາຫລາຍ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະອະພິຊຊາເປັນປັຈຈັຍ.

ເປັນຜູ້ມີຈິຕພະຍາບາທ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະພະຍາບາທເປັນປັຈຈັຍ.

ເປັນຜູ້ມີຄວາມເຫັນຜິດ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະມິຈສາທິຕຖິເປັນປັຈຈັຍ.

ເມື່ອແຕກກາຍຕາຍໄປ ເຂົາຍ່ອມເຂົ້າເຖິງອະບາຍ ທຸຄະຕິ ວິນິບາຕ ນະຣົກ.

ພິກຂຸທັງຫລາຍ! ທັມສະມາທານນີ້ແລ ທີ່ມີສຸຂໃນປັຈຈຸບັນ ແຕ່ມີຂ໌ທຸກຂ໌ເປັນວິບາກຕໍ່ໄປ.

ພິກຂຸທັງຫລາຍ! ກໍທັມສະມາທານທີ່ມີທຸກຂ໌ໃນປັຈຈຸບັນ ແຕ່ມີສຸຂເປັນວິບາກຕໍ່ໄປເປັນຢ່າງໃດ?

ພິກຂຸທັງຫລາຍ! ບຸຄຄົລບາງຄົນໃນໂລກນີ້ ເປັນຜູ້ເວັ້ນຂາດຈາກກາຣຂ້າສັຕ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະກາຣເວັ້ນຈາກປານາຕິບາຕເປັນປັຈຈັຍ.

ເປັນຜູ້ເວັ້ນຂາດຈາກກາຣຖືເອົາສິ່ງຂອງທີ່ເຂົາບໍ່ໄດ້ໃຫ້ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມ ສເວີຍທຸກຂ໌ໂທມະນັສ ເພາະກາຣເວັ້ນຈາກອະທິນນາທານເປັນປັຈຈັຍ.

ເປັນຜູ້ເວັ້ນຂາດຈາກກາຣປະພຶຕຜິດໃນກາມທັງຫລາຍ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມ ສເວີຍທຸກຂ໌ໂທມະນັສ ເພາະກາຣເວັ້ນຈາກກາເມສຸມິຈສາຈາຣເປັນປັຈຈັຍ.

ເປັນຜູ້ເວັ້ນຂາດຈາກກາຣເວົ້າຕົວະ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະກາຣເວັ້ນຈາກມຸສາວາທເປັນປັຈຈັຍ.

ເປັນຜູ້ເວັ້ນຂາດຈາກກາຣເວົ້າສຽດສີ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະກາຣເວັ້ນຈາກປິສຸນາວາຈາເປັນປັຈຈັຍ.

ເປັນຜູ້ເວັ້ນຂາດຈາກກາຣເວົ້າຄຳຫຍາບ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະກາຣເວັ້ນຈາກຜະຣຸສະວາຈາເປັນປັຈຈັຍ.

ເປັນຜູ້ເວັ້ນຂາດຈາກກາຣເວົ້າຄຳສັມຜັປປະລາປະ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະກາຣເວັ້ນຈາກສັມຜັປປະລາປະເປັນປັຈຈັຍ.

ເປັນຜູ້ບໍ່ມີອະພິຊຊາຫລາຍ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະອະນະພິຊຊາເປັນປັຈຈັຍ.

ເປັນຜູ້ບໍ່ມີຈິຕພະຍາບາທ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະກາຣບໍ່ພະຍາບາທເປັນປັຈຈັຍ.

ເປັນຜູ້ມີຄວາມເຫັນຊອບ ປະກອບດ້ວຍທຸກຂ໌ແດ່ ປະກອບດ້ວຍໂທມະນັສແດ່ ຍ່ອມສເວີຍທຸກຂ໌ໂທມະນັສ ເພາະສັມມາທິຕຖິເປັນປັຈຈັຍ.

ເມື່ອແຕກກາຍຕາຍໄປ ເຂົາຍ່ອມເຂົ້າເຖິງສຸຄະຕິໂລກສວັນ.

ພິກຂຸທັງຫລາຍ! ທັມສະມາທານນີ້ແລ ທີ່ມີທຸກຂ໌ໃນປັຈຈຸບັນ ແຕ່ມີສຸຂເປັນວິບາກຕໍ່ໄປ.

ພິກຂຸທັງຫລາຍ! ກໍທັມສະມາທານທີ່ມີສຸຂໃນປັຈຈຸບັນ ແລະມີສຸຂເປັນວິບາກຕໍ່ໄປເປັນຢ່າງໃດ?

ພິກຂຸທັງຫລາຍ! ບຸຄຄົລບາງຄົນໃນໂລກນີ້ ເປັນຜູ້ເວັ້ນຂາດຈາກກາຣຂ້າສັຕ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະກາຣເວັ້ນຈາກປານາຕິບາຕເປັນປັຈຈັຍ.

ເປັນຜູ້ເວັ້ນຂາດຈາກກາຣຖືເອົາສິ່ງຂອງທີ່ເຂົາບໍ່ໄດ້ໃຫ້ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະກາຣເວັ້ນຈາກອະທິນນາທານເປັນປັຈຈັຍ.

ເປັນຜູ້ເວັ້ນຂາດຈາກກາຣປະພຶຕຜິດໃນກາມທັງຫລາຍ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະກາຣເວັ້ນຈາກກາເມສຸມິຈສາຈາຣເປັນປັຈຈັຍ.

ເປັນຜູ້ເວັ້ນຂາດຈາກກາຣເວົ້າຕົວະ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະກາຣເວັ້ນຈາກມຸສາວາທເປັນປັຈຈັຍ.

ເປັນຜູ້ເວັ້ນຂາດຈາກກາຣເວົ້າສຽດສີ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະກາຣເວັ້ນຈາກປິສຸນາວາຈາເປັນປັຈຈັຍ.

ເປັນຜູ້ເວັ້ນຂາດຈາກກາຣເວົ້າຄຳຫຍາບ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະກາຣເວັ້ນຈາກຜະຣຸສະວາຈາເປັນປັຈຈັຍ.

ເປັນຜູ້ເວັ້ນຂາດຈາກກາຣເວົ້າຄຳສັມຜັປປະລາປະ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະກາຣເວັ້ນຈາກສັມຜັປປະລາປະເປັນປັຈຈັຍ.

ເປັນຜູ້ບໍ່ມີອະພິຊຊາຫລາຍ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະອະນະພິຊຊາເປັນປັຈຈັຍ.

ເປັນຜູ້ບໍ່ມີຈິຕພະຍາບາທ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະກາຣບໍ່ພະຍາບາທເປັນປັຈຈັຍ.

ເປັນຜູ້ມີຄວາມເຫັນຊອບ ປະກອບດ້ວຍສຸຂແດ່ ປະກອບດ້ວຍໂສມະນັສແດ່ ຍ່ອມສເວີຍສຸຂໂສມະນັສ ເພາະສັມມາທິຕຖິເປັນປັຈຈັຍ.

ເມື່ອແຕກກາຍຕາຍໄປ ເຂົາຍ່ອມເຂົ້າເຖິງສຸຄະຕິໂລກສວັນ.

ພິກຂຸທັງຫລາຍ! ທັມສະມາທານນີ້ແລ ທີ່ມີສຸຂໃນປັຈຈຸບັນ ແລະມີສຸຂເປັນວິບາກຕໍ່ໄປ.

ພິກຂຸທັງຫລາຍ! ທັມສະມາທານ ໔ ປະກາຣນີ້ແລ.

ພິກຂຸທັງຫລາຍ! ປຽບເໝືອນນ້ຳເຕົ້າຂົມປົນດ້ວຍຢາພິດ ບຸຣຸສທີ່ຮັກຊີວິຕ ບໍ່ຢາກຕາຍ ຮັກສຸຂ ລັງກຽດທຸກຂ໌ ມາເຖິງແລ້ວ ຊົນທັງຫລາຍບອກເຂົາວ່າ ທ່ານຜູ້ຈະເຣີນ ນ້ຳເຕົ້າຂົມນີ້ປົນດ້ວຍຢາພິດ ຖ້າທ່ານປາຖນາຈະດື່ມກໍຈົ່ງດື່ມເຖີດ ນ້ຳເຕົ້າຂົມນັ້ນຈັກບໍ່ແຊບແກ່ທ່ານຜູ້ດື່ມ ທັງສີ ທັງກິ່ນ ທັງຣົສ ຄັນທ່ານດື່ມເຂົ້າແລ້ວ ຈັກເຖິງຄວາມຕາຍ ຫລືຈັກເຖິງຄວາມທຸກຂ໌ປາງຕາຍ. ບຸຣຸສນັ້ນບໍ່ພິຈາຣະນານ້ຳເຕົ້າຂົມນັ້ນແລ້ວ ດື່ມບໍ່ວາງ ຍ່ອມບໍ່ແຊບ ເພາະສີແດ່ ກິ່ນແດ່ ຣົສແດ່ ຄັນດື່ມແລ້ວ ຍ່ອມເຖິງຄວາມຕາຍ ຫລືເຖິງຄວາມທຸກຂ໌ປາງຕາຍ ສັນໃດ; ພິກຂຸທັງຫລາຍ ເຮົາກ່າວທັມສະມາທານທີ່ມີທຸກຂ໌ໃນປັຈຈຸບັນ ແລະມີທຸກຂ໌ເປັນວິບາກຕໍ່ໄປວ່າ ມີອຸປະມາ ສັນນັ້ນ.

ພິກຂຸທັງຫລາຍ! ປຽບເໝືອນພາຊະນະນ້ຳຫວານອັນໜ້າດື່ມ ເຖິງພ້ອມດ້ວຍສີ ກິ່ນ ແລະຣົສ ແຕ່ປົນດ້ວຍຢາພິດ ບຸຣຸສທີ່ຮັກຊີວິຕ ບໍ່ຢາກຕາຍ ຮັກສຸຂ ລັງກຽດທຸກຂ໌ ມາເຖິງແລ້ວ ຊົນທັງຫລາຍບອກເຂົາວ່າ ທ່ານຜູ້ຈະເຣີນ ພາຊະນະນ້ຳຫວານອັນໜ້າດື່ມນີ້ ເຖິງພ້ອມດ້ວຍສີ ກິ່ນ ແລະຣົສ ແຕ່ປົນດ້ວຍຢາພິດ ຖ້າທ່ານປາຖນາຈະດື່ມກໍຈົ່ງດື່ມເຖີດ ພາຊະນະນ້ຳຫວານນັ້ນຈັກຊອບໃຈແກ່ທ່ານຜູ້ດື່ມ ທັງສີ ທັງກິ່ນ ທັງຣົສ ຄັນທ່ານດື່ມເຂົ້າແລ້ວ ຈັກເຖິງຄວາມຕາຍ ຫລືຈັກເຖິງຄວາມທຸກຂ໌ປາງຕາຍ. ບຸຣຸສນັ້ນບໍ່ພິຈາຣະນາພາຊະນະນ້ຳຫວານນັ້ນແລ້ວ ດື່ມບໍ່ວາງ ກໍຊອບໃຈທັງສີແດ່ ທັງກິ່ນແດ່ ທັງຣົສແດ່ ຄັນດື່ມແລ້ວ ຍ່ອມເຖິງຄວາມຕາຍ ຫລືເຖິງຄວາມທຸກຂ໌ປາງຕາຍ ສັນໃດ; ພິກຂຸທັງຫລາຍ ເຮົາກ່າວທັມສະມາທານທີ່ມີສຸຂໃນປັຈຈຸບັນ ແຕ່ມີທຸກຂ໌ເປັນວິບາກຕໍ່ໄປວ່າ ມີອຸປະມາ ສັນນັ້ນ.

ພິກຂຸທັງຫລາຍ! ປຽບເໝືອນມູຕເນົ່າປົນດ້ວຍຢາຕ່າງໆ ບຸຣຸສທີ່ເປັນໂຣຄຜອມເຫລືອງມາເຖິງແລ້ວ ຊົນທັງຫລາຍບອກເຂົາວ່າ ທ່ານຜູ້ຈະເຣີນ ມູຕເນົ່າປົນດ້ວຍຢາຕ່າງໆ ຖ້າທ່ານປາຖນາຈະດື່ມກໍຈົ່ງດື່ມເຖີດ ມູຕເນົ່ານັ້ນຈັກບໍ່ຊອບໃຈແກ່ທ່ານຜູ້ດື່ມ ທັງສີ ທັງກິ່ນ ທັງຣົສ ແຕ່ເມື່ອທ່ານດື່ມເຂົ້າແລ້ວ ຈັກມີຄວາມສຸຂ. ບຸຣຸສນັ້ນພິຈາຣະນາແລ້ວ ດື່ມບໍ່ວາງ ກໍບໍ່ຊອບໃຈ ທັງສີ ທັງກິ່ນ ທັງຣົສ ຄັນດື່ມແລ້ວ ກໍມີຄວາມສຸຂ ສັນໃດ; ພິກຂຸທັງຫລາຍ ເຮົາກ່າວທັມສະມາທານທີ່ມີທຸກຂ໌ໃນປັຈຈຸບັນ ແຕ່ມີສຸຂເປັນວິບາກຕໍ່ໄປວ່າ ມີອຸປະມາ ສັນນັ້ນ.

ພິກຂຸທັງຫລາຍ! ປຽບເໝືອນນົມສົ້ມ ນ້ຳເຜິ້ງ ເນີຍໃສ ແລະນ້ຳອ້ອຍ ເຂົາປົນເຂົ້າດ້ວຍກັນ ບຸຣຸສທີ່ເປັນໂຣຄລົງໂລຫິຕມາເຖິງແລ້ວ ຊົນທັງຫລາຍບອກເຂົາວ່າ ທ່ານຜູ້ຈະເຣີນ ນົມສົ້ມ ນ້ຳເຜິ້ງ ເນີຍໃສ ແລະນ້ຳອ້ອຍນີ້ ເຂົາປົນເຂົ້າດ້ວຍກັນ ຖ້າທ່ານປາຖນາຈະດື່ມກໍຈົ່ງດື່ມເຖີດ ຢານັ້ນຈັກຊອບໃຈແກ່ທ່ານຜູ້ດື່ມ ທັງສີ ທັງກິ່ນ ທັງຣົສ ເມື່ອທ່ານດື່ມເຂົ້າແລ້ວ ຈັກມີຄວາມສຸຂ. ບຸຣຸສນັ້ນພິຈາຣະນາແລ້ວ ດື່ມບໍ່ວາງ ກໍຊອບໃຈ ທັງສີ ທັງກິ່ນ ທັງຣົສ ຄັນດື່ມແລ້ວ ກໍມີຄວາມສຸຂ ສັນໃດ; ພິກຂຸທັງຫລາຍ ເຮົາກ່າວທັມສະມາທານທີ່ມີສຸຂໃນປັຈຈຸບັນ ແລະມີສຸຂເປັນວິບາກຕໍ່ໄປວ່າ ມີອຸປະມາ ສັນນັ້ນ.

ພິກຂຸທັງຫລາຍ! ໃນສາຣະທະສມັຍເດືອນທ້າຍແຫ່ງລະດູຝົນ ໃນອາກາສອັນປອດໂປ່ງ ປາສະຈາກເມກ ດວງອາທິຕລອຍຢູ່ທ້ອງຟ້າ ຍ່ອມກຳຈັດຄວາມມືດອັນມີໃນອາກາສທັງສິ້ນ ຍ່ອມສ່ອງແສງ ແຜດແສງ ຮຸ່ງສະວ່າງ ສັນໃດ; ພິກຂຸທັງຫລາຍ ທັມສະມາທານທີ່ມີສຸຂໃນປັຈຈຸບັນ ແລະມີສຸຂເປັນວິບາກຕໍ່ໄປ ກຳຈັດແລ້ວເຊິ່ງວາທະຂອງສະມະນະແລະພຣາມທັງຫລາຍເຫລົ່າອື່ນ ຍ່ອມສະວ່າງ ຮຸ່ງເຮືອງ ໄພໂຣຈນ໌ ສັນນັ້ນເໝືອນກັນ.

ພຣະຜູ້ມີພຣະພາຄໄດ້ຕຣັສພາສິຕນີ້ແລ້ວ ພິກຂຸເຫລົ່ານັ້ນມີໃຈຊື່ນຊົມຍິນດີພຣະພາສິຕຂອງພຣະຜູ້ມີພຣະພາຄແລ.