ບຸຄຄົລ ໓ ຈຳພວກ

The Buddha's words

ອັງຄຸຕຣະນິກາຍ ເອກ-ທຸກ-ຕິກະນິບາຕ ໒໐/໑໒໓-໑໒໕/໔໖໙

Photo by Pijarn Jangsawang form PxHere

ພິກຂຸທັງຫລາຍ! ບຸຄຄົລ ໓ ຈຳພວກນີ້ ມີປາກົຕຢູ່ໃນໂລກ, ໓ ຈຳພວກເປັນຢ່າງໃດ?

ບຸຄຄົລມີປັນຍາຂວ້ຳ,

ບຸຄຄົລມີປັນຍາເຊັ່ນກັບຕັກ,

ບຸຄຄົລມີປັນຍາກວ້າງຂວາງ,

ພິກຂຸທັງຫລາຍ! ບຸຄຄົລມີປັນຍາຂວ້ຳເປັນຢ່າງໃດ? ພິກຂຸທັງຫລາຍ ບຸຄຄົລບາງຄົນໃນໂລກນີ້ ໝັ່ນໄປວັດເພື່ອຟັງທັມໃນສຳນັກຂອງພິກຂຸສະເໝີ ພິກຂຸຍ່ອມສະແດງທັມອັນງາມໃນເບື້ອງຕົ້ນ ງາມໃນທ່າມກາງ ງາມໃນທີ່ສຸດ ປະກາສພຣົມມະຈັນຍ໌ພ້ອມທັງອັຕຖະ ພ້ອມທັງພະຍັນຊະນະ ບໍຣິສຸທ ບໍຣິບູນສິ້ນເຊິງແກ່ເຂົາ ເຂົານັ່ງເທິງອາສະນະນັ້ນ ຈຳເບື້ອງຕົ້ນ ທ່າມກາງ ທີ່ສຸດຂອງກະຖານັ້ນບໍ່ໄດ້ ເຖິງລຸກຈາກອາສະນະແລ້ວ ກໍຈຳເບື້ອງຕົ້ນ ທ່າມກາງ ທີ່ສຸດຂອງກະຖານັ້ນບໍ່ໄດ້ ປຽບເໝືອນໝໍ້ຂວ້ຳ ເຖິງຈະເອົານ້ຳເທລົງທີ່ໝໍ້ນັ້ນ ກໍຍ່ອມເຮ່ຍໄປ ບໍ່ສາມາດຂັງຢູ່ໄດ້ ສັນໃດ, ບຸຄຄົລບາງຄົນໃນໂລກນີ້ກໍສັນນັ້ນເໝືອນກັນ ໝັ່ນໄປວັດເພື່ອຟັງທັມໃນສຳນັກຂອງພິກຂຸສະເໝີ ພິກຂຸຍ່ອມສະແດງທັມອັນງາມໃນເບື້ອງຕົ້ນ ງາມໃນທ່າມກາງ ງາມໃນທີ່ສຸດ ປະກາສພຣົມມະຈັນຍ໌ພ້ອມທັງອັຕຖະ ພ້ອມທັງພະຍັນຊະນະ ບໍຣິສຸທ ບໍຣິບູນສິ້ນເຊິງແກ່ເຂົາ ເຂົານັ່ງເທິງອາສະນະນັ້ນ ຈຳເບື້ອງຕົ້ນ ທ່າມກາງ ທີ່ສຸດຂອງກະຖານັ້ນບໍ່ໄດ້ ເຖິງລຸກຈາກອາສະນະແລ້ວ ກໍຈຳເບື້ອງຕົ້ນ ທ່າມກາງ ທີ່ສຸດຂອງກະຖານັ້ນບໍ່ໄດ້. ພິກຂຸທັງຫລາຍ ນີ້ຮຽກວ່າ ບຸຄຄົລມີປັນຍາຂວ້ຳ.

ພິກຂຸທັງຫລາຍ! ບຸຄຄົລມີປັນຍາເຊັ່ນກັບຕັກເປັນຢ່າງໃດ? ພິກຂຸທັງຫລາຍ ບຸຄຄົລບາງຄົນໃນໂລກນີ້ ໝັ່ນໄປວັດເພື່ອຟັງທັມໃນສຳນັກຂອງພິກຂຸສະເໝີ ພິກຂຸຍ່ອມສະແດງທັມອັນງາມໃນເບື້ອງຕົ້ນ ງາມໃນທ່າມກາງ ງາມໃນທີ່ສຸດ ປະກາສພຣົມມະຈັນຍ໌ພ້ອມທັງອັຕຖະ ພ້ອມທັງພະຍັນຊະນະ ບໍຣິສຸທ ບໍຣິບູນສິ້ນເຊິງແກ່ເຂົາ ເຂົານັ່ງເທິງອາສະນະນັ້ນ ຈຳເບື້ອງຕົ້ນ ທ່າມກາງ ທີ່ສຸດຂອງກະຖານັ້ນໄດ້ ຄັນລຸກຈາກອາສະນະແລ້ວ ກໍຈຳເບື້ອງຕົ້ນ ທ່າມກາງ ທີ່ສຸດຂອງກະຖານັ້ນບໍ່ໄດ້ ປຽບເໝືອນເທິງຕັກຂອງບຸຣຸສມີຂອງຄ້ຽວນານາຊະນິດຄື ງາ ເຂົ້າສານ ຂະໜົມຕົ້ມ ພຸທຣາ ເກື່ອນກາດ ເຂົາລຸກຈາກອາສະນັ້ນ ຍ່ອມກະທຳເຮ່ຍລາດໄປ ເພາະເຜີສະຕິ ສັນໃດ, ບຸຄຄົລບາງຄົນໃນໂລກນີ້ ກໍສັນນັ້ນເໝືອນກັນ ໝັ່ນໄປວັດເພື່ອຟັງທັມໃນສຳນັກຂອງພິກຂຸສະເໝີ ພິກຂຸຍ່ອມສະແດງທັມອັນງາມໃນເບື້ອງຕົ້ນ ງາມໃນທ່າມກາງ ງາມໃນທີ່ສຸດ ປະກາສພຣົມມະຈັນຍ໌ພ້ອມທັງອັຕຖະ ພ້ອມທັງພະຍັນຊະນະ ບໍຣິສຸທ ບໍຣິບູນສິ້ນເຊິງແກ່ເຂົາ ເຂົານັ່ງເທິງອາສະນະນັ້ນ ຈຳເບື້ອງຕົ້ນ ທ່າມກາງ ທີ່ສຸດຂອງກະຖານັ້ນໄດ້ ຄັນລຸກຈາກອາສະນະແລ້ວ ກໍຈຳເບື້ອງຕົ້ນ ທ່າມກາງ ທີ່ສຸດຂອງກະຖານັ້ນບໍ່ໄດ້. ພິກຂຸທັງຫລາຍ ນີ້ຮຽກວ່າ ບຸຄຄົລມີປັນຍາເຊັ່ນກັບຕັກ.

ພິກຂຸທັງຫລາຍ! ບຸຄຄົລມີປັນຍາກວ້າງຂວາງເປັນຢ່າງໃດ? ພິກຂຸທັງຫລາຍ ບຸຄຄົລບາງຄົນໃນໂລກນີ້ ໝັ່ນໄປວັດເພື່ອຟັງທັມໃນສຳນັກຂອງພິກຂຸສະເໝີ ພິກຂຸຍ່ອມສະແດງທັມອັນງາມໃນເບື້ອງຕົ້ນ ງາມໃນທ່າມກາງ ງາມໃນທີ່ສຸດ ປະກາສພຣົມມະຈັນຍ໌ພ້ອມທັງອັຕຖະ ພ້ອມທັງພະຍັນຊະນະ ບໍຣິສຸທ ບໍຣິບູນສິ້ນເຊິງແກ່ເຂົາ ເຂົານັ່ງເທິງອາສະນະນັ້ນ ຈຳເບື້ອງຕົ້ນ ທ່າມກາງ ທີ່ສຸດຂອງກະຖານັ້ນໄດ້ ເຖິງລຸກຈາກອາສະນະແລ້ວ ກໍຈຳເບື້ອງຕົ້ນ ທ່າມກາງ ທີ່ສຸດຂອງກະຖານັ້ນໄດ້ ປຽບເໝືອນໝໍ້ຫງາຍ ເອົານ້ຳເທໃສ່ໄປໃນໝໍ້ນັ້ນ ຍ່ອມຂັງຢູ່ ບໍ່ໄຫລອອກ ສັນໃດ, ບຸຄຄົລບາງຄົນໃນໂລກນີ້ ກໍສັນນັ້ນເໝືອນກັນ ໝັ່ນໄປວັດເພື່ອຟັງທັມໃນສຳນັກຂອງພິກຂຸສະເໝີ ພິກຂຸຍ່ອມສະແດງທັມອັນງາມໃນເບື້ອງຕົ້ນ ງາມໃນທ່າມກາງ ງາມໃນທີ່ສຸດ ປະກາສພຣົມມະຈັນຍ໌ພ້ອມທັງອັຕຖະ ພ້ອມທັງພະຍັນຊະນະ ບໍຣິສຸທ ບໍຣິບູນສິ້ນເຊິງແກ່ເຂົາ ເຂົານັ່ງເທິງອາສະນະນັ້ນ ຈຳເບື້ອງຕົ້ນ ທ່າມກາງ ທີ່ສຸດຂອງກະຖານັ້ນໄດ້ ເຖິງລຸກຈາກອາສະນະແລ້ວ ກໍຈຳເບື້ອງຕົ້ນ ທ່າມກາງ ທີ່ສຸດຂອງກະຖານັ້ນໄດ້. ພິກຂຸທັງຫລາຍ ນີ້ຮຽກວ່າ ບຸຄຄົລມີປັນຍາກວ້າງຂວາງ.

ພິກຂຸທັງຫລາຍ! ບຸຄຄົລ ໓ ຈຳພວກນີ້ແລ ມີປາກົຕຢູ່ໃນໂລກ.

ບຸຣຸສມີປັນຍາຂວ້ຳ ເປັນຄົນໂງ່ເຂົາ ໄຮ້ປັນຍາເປັນເຄື່ອງພິຈາຣະນາ ບຸຣຸສເຊັ່ນນັ້ນເຖິງຈະໝັ່ນໄປໃນສຳນັກຂອງພິກຂຸສະເໝີ ກໍບໍ່ສາມາດຈະເລົ່າຮຽນເບື້ອງຕົ້ນ ທ່າມກາງແລະທີ່ສຸດຂອງກະຖາໄດ້ ເພາະເຂົາບໍ່ມີປັນຍາ ບຸຣຸສມີປັນຍາເໝືອນຕັກ ເຮົາກ່າວວ່າດີກວ່າບຸຣຸສມີປັນຍາຂວ້ຳ ບຸຣຸສເຊັ່ນນັ້ນເຖິງຈະໝັ່ນໄປໃນສຳນັກຂອງພິກຂຸສະເໝີ ນັ່ງເທິງອາສະນະນັ້ນ ຮຽນເບື້ອງຕົ້ນ ທ່າມກາງແລະທີ່ສຸດຂອງກະຖາໄດ້ ຄັນລຸກມາແລ້ວ ກຳນົດຈົດຈຳພະຍັນຊະນະບໍ່ໄດ້ ເພາະພະຍັນຊະນະທີ່ເຂົາຮຽນແລ້ວເລິເລືອນໄປ. ສ່ວນບຸຣຸສມີປັນຍາກວ້າງຂວາງ ເຮົາກ່າວວ່າດີກວ່າບຸຣຸສທີ່ມີປັນຍາເໝືອນຕັກ ບຸຣຸສເຊັ່ນນັ້ນ ໄປໃນສຳນັກຂອງພິກຂຸສະເໝີ ນັ່ງເທິງອາສະນະນັ້ນ ເລົ່າຮຽນເບື້ອງຕົ້ນ ທ່າມກາງ ແລະທີ່ສຸດຂອງກະຖາໄດ້ ແລ້ວຈຳພະຍັນຊະນະໄວ້ ເປັນຄົນມີຄວາມດຳຣິປະເສີດສຸດ ມີໃຈບໍ່ສົງສັຍ ປະຕິບັຕທັມສົມຄວນແກ່ທັມ ຍ່ອມກະທຳທີ່ສຸດແຫ່ງທຸກຂ໌ໄດ້.