ສັຕຕາວາສ ໙

The Buddha's words

ອັງຄຸຕຕະຣະນິກາຍ ສັຕຕະກະ-ອັຕຖະກະ-ນະວະກະນິບາຕ ໒໓/໓໒໓-໓໒໔/໒໒໘

Image from Wix

ພິກຂຸທັງຫລາຍ! ສັຕຕາວາສ ໙ ເຫລົ່ານີ້, ສັຕຕາວາສ ໙ ເປັນຢ່າງໃດ?

ພິກຂຸທັງຫລາຍ! ສັຕພວກໜຶ່ງມີກາຍຕ່າງກັນ ມີສັນຍາຕ່າງກັນ ຄື ມະນຸສທັງຫລາຍ, ເທວະດາບາງພວກ, ວິນິບາຕບາງພວກ ນີ້ເປັນສັຕຕາວາສທີ ໑.

ສັຕພວກໜຶ່ງມີກາຍຕ່າງກັນ ມີສັນຍາຢ່າງດຽວກັນ ຄື ເທວະດາຊັ້ນພຣົມກາຍິກາ ທີ່ເກີດໃນປະຖະມາພິນິພພັຕຕາ ນີ້ເປັນສັຕຕາວາສທີ ໒.

ສັຕພວກໜຶ່ງມີກາຍຢ່າງດຽວກັນ ມີສັນຍາຕ່າງກັນ ຄື ເທວະດາຊັ້ນອາພັສສະຣະ ນີ້ເປັນສັຕຕາວາສທີ ໓.

ສັຕພວກໜຶ່ງມີກາຍຢ່າງດຽວກັນ ມີສັນຍາຢ່າງດຽວກັນ ຄື ເທວະດາຊັ້ນສຸພະກິນຫະ ນີ້ເປັນສັຕຕາວາສທີ ໔.

ສັຕພວກໜຶ່ງບໍ່ມີສັນຍາ ບໍ່ສເວີຍເວທະນາ ຄື ເທວະດາຜູ້ເປັນອະສັນຍີສັຕ ນີ້ເປັນສັຕຕາວາສທີ ໕

ສັຕພວກໜຶ່ງເຂົ້າເຖິງຊັ້ນອາກາສານັນຈາຍະຕະນະ ໂດຍມະນະສິກາຣວ່າ ອາກາສບໍ່ມີທີ່ສຸດ ເພາະລ່ວງຣູປສັນຍາໂດຍປະກາຣທັງປວງ ເພາະດັບປະຕິຄະສັນຍາ ເພາະບໍ່ໃສ່ໃຈໃນນານັຕຕະສັນຍາ ນີ້ເປັນສັຕຕາວາສທີ ໖.

ສັຕພວກໜຶ່ງເຂົ້າເຖິງຊັ້ນວິນຍານັນຈາຍະຕະນະ ໂດຍມະນະສິກາຣວ່າ ວິນຍານບໍ່ມີທີ່ສຸດ ເພາະລ່ວງອາກາສານັນຈາຍະຕະນະໂດຍປະກາຣທັງປວງ ນີ້ເປັນສັຕຕາວາສທີ ໗.

ສັຕພວກໜຶ່ງເຂົ້າເຖິງຊັ້ນອາກິນຈັນຍານັນຈາຍະຕະນະ ໂດຍມະນະສິກາຣວ່າ ບໍ່ມີອັນໃດໆ ເພາະລ່ວງວິນຍານັນຈາຍະຕະນະໂດຍປະກາຣທັງປວງ ນີ້ເປັນສັຕຕາວາສທີ ໘.

ສັຕພວກໜຶ່ງເຂົ້າເຖິງຊັ້ນເນວະສັນຍານາສັນຍານັນຈາຍະຕະນະ ເພາະລ່ວງອາກິນຈັນຍານັນຈາຍະຕະນະໂດຍປະກາຣທັງປວງ ນີ້ເປັນສັຕຕາວາສທີ ໙.

ພິກຂຸທັງຫລາຍ! ສັຕຕາວາສ ໙ ເຫລົ່ານີ້ແລ.